قال بنقال قال
اول ما تسمعون كلمة بنقالي .. يجي في بالكم الإجرام والسرقه
وهذا بسبب ما رسمته لكم الصحف المحليه بعد الحمله اللي وجهوها ضدهم ..
واقنعونا ان السبب في عدم وجود الأمن هم البنقال .. وليس تقصير من وزارة الداخليه متمثله بالشرطه ( العيون الساهره)
والناظر لموضوع ان مشاكل البنقال موجوده بس عندنا .. بيدري ان المشكله في ديرتنا وليس في البنقال ..
بدليل ان كل دول العالم فيها من هالجنسيه .. ولكن حنا الوحيدين اللي نشتكي
وهذا ان دل فيدل ان أرضنا خصبه لمحبين المشاكل ..
على العموم مو هذا موضوعي ..
فيه عندنا عامل في الدوام توه راجع من اجازته …
وهو انسان خيّر وعلى نياته .. وضعيّف بمعنى الكلمه
المهم سلمت عليه .. وقلت له هاه كل شئ كويس بلد انتا كويس ( مدري ليه نكلمهم بهالطريقه كأننا برنامج معرب))
المهم ..
قالي والله الحمد لله كل شئ كويس ..
بس صارت لي مشكله قبل لا اسافر ..
يقول كنت في القطيف
ورحت البنك وحولت فلوسي لديرتي .. وبقيت معاي 1500 ريال علشان بشتري لي كم غرض قبل لا اسافر
يقول طلعت من البنك ومشيت على رجولي ..
ولما صرت في منطقه مظلمه شوي
يقول ما حسيت الا بالسكين على رقبتي
ثلاثه شباب سعودين مسكو الحبيب وسرقو محفظته ونبشو جيوبه واللي حصلوه خذوه
قلت له : اكيد اكيد سعوديين
قال والله بابا كلوه ثلاثه نفر هازا سعودي
قلت بخاطري ” قال بنقالي قال ”
والله وبدو السعوديين يخطفون ويسرقون العماله ..
ياسلام سلّم
طبعاً نفس الحادثه هذي صارت لخالي .. في سوق الخميس في القطيف
مسكوه بالنافذ وهو رايح لسيارته .. وحطو السكين بظهره وقالو له هات الجوال
يقول خالي شفتهم الا هم اثنين على دباب ينتظرون خويهم
وقلت وش لي ووللطلايب ..
والظاهر انه قالهم خلني اخذ الشريحه بس وعطاهم الجوال ..
وبعد سوالفي مع واحد من اخوياي من القطيف ..
أكد لي هالكلام وقال حوادث كثير مشابهه صارت لناس يعرفهم
ويقول انه الآن منتشرين عصابات على دبابات ويسرقون العالم في كل محل
قلت له طيب والشرطه؟
قال لي : ابراهيم كيف حالك انت اليوم مرتاح؟ 
وكان قصده وسسسسسع صدرك
*************
تدوينات سابقه لي في نفس الموضوع:
خلاصات المدونة