الدرباس ونقص الدقيق

بعد ماسمعت عن انهيار جسر الدمام , وبعد ماتذكرة ان قبل لا ينهار الجسر باسبوعين كانت فيه ازمة دقيق بالمنطقه الشرقيه

وبما ان الجسر في المنطقه الشرقيه , وبما ان الأسمنت غالي

أجل مايبيلها واحد اثنين… طلعت باستنتاجي … اللي هو :-

إن الدرباس هو سبب رفع أسعار الدقيق , وذلك بسبب انه استبدل الأسمنت بالطحين …

*******************

وفي أثناء بحثي في الانترنت عن خبر الإنهيار … اكتشفت ان الدرباس من أكثر المقاولين اللي يحبون الوطن …

بدليل انه مآخذ كل هالمشاريع :

1- مشروع نفق الخبر = (( شركة الدرباس للمقاولات )) انتهى …. اذا دخلتوه , تحسون انكم داخلين دورة مياه وانتو الكرامه

2- مشروع النفق الاول = (( شركة الدرباس للمقاولات )) انتهى … كل شهرين يسوون له صيانه

3- مشروع النفق الثاني = (( شركة الدرباس للمقاولات )) انتهى …. هو ماهو نفق بمعنى الكلمه … تقدرون تقولون عنه داعوس ( زقاق )

4- مشروع النفق الثالث = (( شركة الدرباس للمقاولات )) جاري العمل به

5- مشروع الجسر فوق النفق 2 = (( شركة الدرباس للمقاولات )) هو اللي انهار بالصور اعلاه

6- مشروع ايصال طريق الرياض = (( شركة الدرباس للمقاولات )) جاري العمل به

7- مشروع جسر شارع الملك عبدالعزيز = (( شركة الدرباس للمقاولات )) جاري العمل به

أنا أشهد انه يحب وطنه …. ولا يعرف الإيثار في هذي الأمور

ومن هذا المنبر , أحب أقول للبلديه ” كيف الحال ؟ ”

مقاول واحد يآخذ كل هالمشاريع !! ماقد سمعتو عن المناقصات ؟

من باب أولى إيقاف التعامل معه , واحالته للتحقيق ,خصوصاً بعد الفضيحه اللي صارت في أنفاق الدمام , وختمها بفضيحة الإنهيار..

والله عيب

مصنف في: حلطمه | | |

خلاصات المدونة